Dostlarım ve zenaatdaşlarımnen beraber bu kibi media nasıl ola bilecegi aqqında çoq tüşündim. "Elâk olğanlar" dep ayta ediler. Lâkin men cenkniñ başından berli mersiyeler yazğanım içün eminim ki, olar esasen ölüm aqqında degil de, yaşayış aqqında. Men inanam ki, elâk olğanlarnıñ ikâyeleri ile media tek eyecanlandırmağa ya da raatsızlamağa degil de, aynı zamanda cesaretlendirmege ve quvet berbege de yardım ete bile. Men ümüt etem ki, elâk olğanlarnıñ hatırası, sağ olğanlarğa daa çoq qıymet bermege yardım eter. İnanam ki, er kün bir çoq adam ölgende, er bir insannıñ qıymetini qayd etmek daa müimdir.
"Striy", elâk olğanlarnıñ tercimeiallarını tarif etecek. Qara-beyaz degil, kerçek. Sayğı ile, isbatlanğan faktlarnen ve sensatsiyalı serlevalarsız. "Striy" elâk olğanlarnıñ qorantaları içün müim ve kerekli malümatnı qıdıracaq, ekspertlernen subetleşecek, meselelerniñ acınıqlı ve zayıf taraflarını aydınlatacaq. "Striy" online hatıra, malümat bazası, yol köstergiçi ve toplulıq meydançığı olacaq. Ümüt etem ki, "Striy" bu cenkte yaqınlarını ğayıp etkenlerge destek olacaq. Yani, er birimiz içün.
"Striy" cenk areketleri ve şimdiki vaqıtta elâq olğan arbiyler aqqında aytmaq kerekmi degen munaqaşalar arasında başlana. Men, şübesiz, öyle dep tüşüngenlerdenim. Elâk olğanlarnı ürmet etmek ve sağ olğanlarğa qol tutmaqnı barışıq ve ğalebege qadar lâğu etmek olmaz. Bu olmadan olar da olmazlsr. Hatıra da bizim silâmızdır.

Böyle bir media yapmaq ve biñlernen adamlarımıznıñ ölmesini iç bir vaqıt istemez edim. Amma bu imkânsız. Qaramanlar öle. Amma olarnıñ ikâyeleri ebediy yaşay bile. Çünki hatıra bu ölümsizliktir.
Ve bu er birimizge bağlı.